ഒമാന്റെ നിക്ഷേപ സാധ്യതകൾ ഉയർത്തിക്കാട്ടിയും അന്താരാഷ്ട്ര ബിസിനസ് പങ്കാളിത്തം ശക്തമാക്കിയും ‘ഇൻസ്പയർ ഒമാൻ ഇൻവെസ്റ്റേഴ്സ് സമ്മിറ്റ്’ സമാപിച്ചു. മസ്കത്തിലെ സെന്റ് റീജിസിൽ നടന്ന ഉച്ചകോടിയിൽ ഒമാൻ, മറ്റ് ജിസിസി രാജ്യങ്ങൾ, ഇന്ത്യ, പാകിസ്താൻ, ബംഗ്ലാദേശ് എന്നിവിടങ്ങളിൽ നിന്നുള്ള പ്രമുഖ നിക്ഷേപകർ, സംരംഭകർ, നയരൂപകർത്താക്കൾ എന്നിവർ പങ്കെടുത്തു.
ഒമാൻ ചേംബർ ഓഫ് കൊമേഴ്സ് ആൻഡ് ഇൻഡസ്ട്രിയുടെ (ഒസിസിഐ) നേതൃത്വത്തിൽ സംഘടിപ്പിച്ച ഉച്ചകോടി സുൽത്താനേറ്റിന്റെ പൈതൃകവും സാമ്പത്തിക പുരോഗതിയും നിക്ഷേപ സാധ്യതകളും വരച്ചുകാട്ടി ആഗോള സമ്പദ്‌വ്യവസ്ഥയിലെ മാറ്റങ്ങൾക്കിടയിലും ഒമാൻ വാഗ്ദാനം ചെയ്യുന്ന സുസ്ഥിരതയും ആഗോള വിപണികളിലേക്കുള്ള പ്രവേശനവും പുതിയ അവസരങ്ങൾ തുറക്കുന്നതായി ഒസിസിഐ ചെയർമാൻ ശൈഖ് ഫൈസൽ ബിൻ അബ്ദുള്ള അൽ റവാസ് പറഞ്ഞു. കേവലം മൂലധന സമാഹരണത്തിനപ്പുറം സാങ്കേതികവിദ്യ കൈമാറുന്നതിനും തദ്ദേശീയമായി തൊഴിലവസരങ്ങൾ സൃഷ്ടിക്കുന്നതിനുമുള്ള പങ്കാളിത്തമാണ് ഒമാൻ ലക്ഷ്യമിടുന്നതെന്നും അദ്ദേഹം വ്യക്തമാക്കി. ചടങ്ങിൽ ഒമാൻ രാജ കുടുംബാംഗം സയ്യിദ് മുഹമ്മദ് ബിൻ സാലിം അൽ സയീദ് മുഖ്യാതിഥിയായി. വിവിധ ബിസിനസ് ഗ്രൂപ്പുകളുടെ ഒമാനിലെ വമ്പൻ ഇൻവെസ്റ്റ്മെന്റ് പദ്ധതികളും ചടങ്ങിൽ പ്രഖ്യാപിച്ചു.
ഇന്ത്യയുടെ സാമ്പത്തിക വളർച്ച ഒമാൻ ഉൾപ്പെടെയുള്ള സുഹൃദ് രാജ്യങ്ങൾക്ക് വലിയ അവസരമാണ് നൽകുന്നതെന്ന് ഒമാനിലെ ഇന്ത്യൻ അംബാസഡർ പ്രശാന്ത് പിസെ പറഞ്ഞു. ആഗോള അനിശ്ചിതത്വങ്ങൾക്കിടയിലും ഇന്ത്യ 7.5 ശതമാനത്തിലധികം വളർച്ച കൈവരിക്കുന്നുണ്ടെന്ന് അദ്ദേഹം ചൂണ്ടിക്കാട്ടി. 2026 ജൂൺ 1-ന് നിലവിൽ വന്ന ഇന്ത്യ-ഒമാൻ സമഗ്ര സാമ്പത്തിക പങ്കാളിത്ത കരാർ (സെപ) ഇരുരാജ്യങ്ങളും തമ്മിലുള്ള വിപണി പ്രവേശനവും നിക്ഷേപവും കൂടുതൽ എളുപ്പമാക്കുമെന്ന് ഇന്ത്യൻ എംബസി ഫസ്റ്റ് സെക്രട്ടറി സതീഷ് ബി. കൃഷ്ണൻ വിശദീകരിച്ചു. ഒമാന്റെ സാമ്പത്തിക പുരോഗതിക്കും തൊഴിലവസരങ്ങൾ സൃഷ്ടിക്കുന്നതിനും സംഭാവന നൽകിയ പ്രമുഖ സംരംഭകരെ ചടങ്ങിൽ ആദരിച്ചു. ഡോ. പി മുഹമ്മദാലി, കിരൺ ആഷർ, എന്നിവർ തങ്ങളുടെ ബിസിനസ്സ് അനുഭവങ്ങൾ പങ്കുവെച്ച 'മീറ്റ് ദി പയനിയേഴ്സ്' സെഷനും ശ്രദ്ധേയമായി.
രാജ്യാന്തര മോട്ടിവേഷണൽ സ്പീക്കർ അർഫീൻ ഖാൻ നയിച്ച സെഷൻ സദസ്സിന് പുതിയൊരു അനുഭവമായി മാറി. ഒസിസിഐ വിദേശ നിക്ഷേപ സമിതി അധ്യക്ഷൻ അബ്ദുൾ ലത്തീഫ്, കർണാടക ആരോഗ്യമന്ത്രി യുടി. ഖാദർ എന്നിവരും സംസാരിച്ചു. ബിസിനസ് രംഗത്തെ സുസ്ഥിര മാതൃകയെ കുറിച്ചുള്ള ചർച്ചയിൽ ഒമാന്റെ ഹരിത ഭാവിയും സർക്കുലർ ഇക്കോണമിയും അടിസ്ഥാനമാക്കി പാനൽ ചർച്ച നടന്നു. ഒമാൻ പരിസ്ഥിതി അതോറിറ്റിയിലെ എൻവയോൺമെന്റൽ കോംപ്ലയൻസ് വിഭാഗം ഡയറക്ടർ ജനറൽ ഡോ. മുഹമ്മദ് സൈഫ് അൽ കൽബാനി, ഇഎം. ബദറുദ്ദീൻ ഷിജു ശശിധരൻ, ഡോ. ഹുസൈൻ മുഹമ്മദ് അൽ മസ്കത്തി, മുഹമ്മദ് അമീൻ സേട്ട് എന്നിവർ പങ്കെടുത്തു. ഒമാൻവിഷൻ 2040 ലേക്കുളള സുൽത്താനേറ്റിന്റെ ജൈത്രയാത്രയിലേക്കുളള ചൂണ്ടുപലകയായും ഒമാനിലെ പ്രവാസി വ്യവസായികളുടെ വിജയഗാഥകളുടെ അടയാളപ്പെടുത്തലായും ഇൻസ്പയർ ഒമാൻ മാറി എന്ന് പങ്കെടുത്ത വ്യവസ്ഥ വ്യവസായ പ്രമുഖർ അഭിപ്രായപ്പെട്ടു.
Content Highlights: Inspire Oman Investors Summit 2026 concluded in Muscat, highlighting investment opportunities and announcing new projects to strengthen international business partnerships and support Oman Vision 2040.